ເອລີເມເລັກ ກັບ ຄອບຄົວ ໄປ ອາໄສ ຢູ່ໃນ ປະເທດ ໂມອາບ
1ໃນ ຄາວ ທີ່ ພວກຜູ້ປົກຄອງ ຄອບຄອງ ອິສຣາເອນ ຢູ່ ນັ້ນ ໄດ້ ມີ ການ ອຶດຢາກ ເກີດ ຂຶ້ນ ໃນ ປະເທດ.2ຈົນ ເປັນ ເຫດ ໃຫ້ ຊາຍ ຄົນ ໜຶ່ງ ຊື່ວ່າ ເອລີເມເລັກ ພ້ອມກັບ ນາງ ນາໂອມີ ຜູ້ ເປັນ ເມຍ ແລະ ລູກຊາຍ ສອງ ຄົນ ຄື ມາໂລນ ແລະ ກີລີໂອນ ໜີ ຈາກ ເມືອງ ເບັດເລເຮັມ ໃນ ຢູດາ ໄປ ອາໄສ ຢູ່ໃນ ປະເທດ ໂມອາບ ພວກ ເຂົາ ເປັນ ຄົນ ເອຟຣາທາ.3ຢູ່ ຕໍ່ມາ ເອລີເມເລັກ ກໍ ຕາຍ ໄປ ນາງ ນາໂອມີ ຜູ້ ເປັນ ເມຍ ຈຶ່ງ ໃຊ້ ຊີວິດ ຢູ່ ກັບ ລູກຊາຍ ທັງ ສອງ.4ຕໍ່ມາ ອີກ ບໍ່ດົນ ລູກຊາຍ ທັງ ສອງ ກໍໄດ້ ແຕ່ງງານ ກັບ ຍິງສາວ ຊາວ ໂມອາບ ຄື ນາງ ໂອປາ ແລະ ນາງຣຸດ ພວກ ເຂົາ ໄດ້ ພາກັນ ຕັ້ງ ຖິ່ນຖານ ຢູ່ ທີ່ ນັ້ນ ປະມານ ສິບ ປີ.5ແລ້ວ ມາໂລນ ກັບ ກີລີໂອນ ກໍໄດ້ ຕາຍ ໄປ ອີກ ນາງ ນາໂອມີ ຈຶ່ງ ໃຊ້ ຊີວິດ ຢູ່ ກັບ ລູກໃພ້ ທັງ ສອງ.
ນາໂອມີ ແລະ ນາງຣຸດ ກັບ ຄືນ ເມືອ ເມືອງ ເບັດເລເຮັມ
6–7ຄັນ ຕໍ່ມາ ນາງ ນາໂອມີ ກໍ ໄດ້ຍິນ ຂ່າວ ວ່າ ພຣະຜູ້ເປັນເຈົ້າ ໄດ້ ຊົງ ໂຜດປະທານ ເຂົ້າ ປາ ອາຫານ ແກ່ ຊາວເມືອງ ເບັດເລເຮັມ ນາງ ພ້ອມ ດ້ວຍ ລູກໃພ້ ທັງ ສອງ ຈຶ່ງ ຕຽມ ຕົວ ອອກ ເດີນທາງ ມຸ່ງ ໜ້າ ຄືນ ສູ່ ເມືອງ ເບັດເລເຮັມ ລາຊະອານາຈັກ ຢູດາ.8ໃນ ລະຫວ່າງ ເດີນທາງ ໄປນັ້ນ ນາງ ນາໂອມີ ໄດ້ ເວົ້າ ກັບ ລູກໃພ້ ທັງ ສອງ ວ່າ, “ຈົ່ງ ພາ ກັນກັບ ຄືນ ເມືອ ຢູ່ບ້ານ ພໍ່ ແມ່ ຂອງ ພວກ ເຈົ້າ ສາ ແລະ ຂໍ ໃຫ້ ພຣະເຈົ້າ ໂຜດປະທານ ຄວາມ ຜາ ສຸກ ໃຫ້ ແກ່ ພວກ ເຈົ້າ ເໝືອນ ດັ່ງ ທີ່ ພວກ ເຈົ້າ ເຄີຍ ເຮັດ ແກ່ ແມ່ ແລະ ແກ່ ຜູ້ ທີ່ ຕາຍ ໄປ ແລ້ວ ນັ້ນ.9ນອກ ນີ້ ຂໍ ໃຫ້ ພຣະຜູ້ເປັນເຈົ້າ ຊົງ ໂຜດປະທານ ຄວາມສະຫງົບສຸກ ເມື່ອ ເວລາ ພວກ ເຈົ້າ ມີ ຄອບຄົວ ໃໝ່.” ຫລັງຈາກນັ້ນ ນາງ ນາໂອມີ ກໍ ກອດ ຈູບ ສັ່ງ ລາ ລູກໃພ້ ທັງ ສອງ ດ້ວຍ ຄວາມ ສົງສານ ພວກ ເຂົາ ທັງ ສອງ ຈຶ່ງ ຮ້ອງໄຫ້ ດ້ວຍ ຄວາມ ອາໄລ ອາວອນ.10ພ້ອມ ທັງ ໄດ້ ເວົ້າ ກັບ ແມ່ຍ່າ ວາ, “ພວກ ລູກ ຈະ ບໍ່ ເມືອ ຈະ ໄປ ຢູ່ ນຳ ແມ່ ແລະ ພີ່ນ້ອງ ຂອງ ແມ່.”
11ນາງ ນາໂອມີ ຂໍຮ້ອງ ຕື່ມ ອີກ ວ່າ, “ຈົ່ງ ກັບ ຄືນ ເມືອບ້ານ ຂອງ ພວກ ລູກ ສາ ຢາກ ໄປ ນຳ ແມ່ ເຮັດຫຍັງ ຫລື ພວກ ລູກ ຄິດວ່າ ແມ່ ຍັງ ມີ ລູກຊາຍ ທີ່ ພໍ ຈະໃຫ້ ພວກ ເຈົ້າ ໄດ້ ແຕ່ງງານ ນຳ ອີກ ບໍ?12ຈົ່ງ ກັບ ເມືອ ເສຍ ແມ່ ນີ້ ເຖົ້າ ແກ່ ກາຍ ຍາມ ຈະ ແຕ່ງງານ ໃໝ່ ແລ້ວ ສົມມຸດ ວ່າ,13ແມ່ ຈະ ແຕ່ງງານ ໃນ ຄືນ ນີ້ ແລ້ວ ມີ ລູກຊາຍ ໃໝ່ ອີກ ພວກ ລູກ ກໍ ຈະ ພາກັນ ຢູ່ ຖ້າ ຈົນ ລາວ ໃຫຍ່ ແລ້ວ ແຕ່ງງານ ກັບ ລາວ ຫລື? ພວກ ລູກ ຈະ ບໍ່ ແຕ່ງງານ ກັບ ຄົນ ອື່ນ ອີກ ບໍ? ເປັນ ໄປ ບໍ່ໄດ້ ດອກ ລູກ ເອີຍ ແມ່ ມີ ຄວາມ ສົງສານ ພວກ ເຈົ້າ ຫລາຍ ຍ້ອນ ວ່າການ ກະທຳ ຂອງ ແມ່ ອາດ ເປັນ ທີ່ ບໍ່ ພໍພຣະໄທ ພຣະເຈົ້າ.”
14ເມື່ອ ໄດ້ຍິນ ແມ່ຍ່າ ເວົ້າ ດັ່ງນັ້ນ ພວກ ເຂົາ ກໍພາກັນ ຮ້ອງໄຫ້ ອີກ ແລ້ວ ນາງ ໂອປາ ໄດ້ ກອດ ຈູບ ຍ່າ ແລະ ອຳ ລາ ກັບ ຄືນ ໄປ ຫາ ພີ່ນ້ອງ ຂອງຕົນ ສ່ວນ ນາງຣຸດ ບໍ່ຍອມ ໜີ ຈາກ ຍ່າ ເດັດຂາດ.15ນາງ ນາໂອມີ ຈຶ່ງ ເວົ້າ ຕໍ່ ນາງຣຸດ ວ່າ, “ເບິ່ງ ແມ ນາງ ໂອປາ ກໍໄດ້ ກັບ ຄືນ ໄປ ຫາ ພີ່ນ້ອງ ແລະ ພຣະເຈົ້າ ຂອງ ນາງ ຢູ່ບ້ານ ເກົ່າ ແລ້ວ.”16ແຕ່ ນາງຣຸດ ໄດ້ ຕອບ ຍ່າ ວ່າ, “ຢ່າ ຮ້ອງ ຂໍ ໃຫ້ ລູກ ເຊົາ ຕິດຕາມ ແລະ ຈາກ ແມ່ຍ່າ ໄປ ທ້ອນ ແມ່ ໄປ ທີ່ ໃດ ລູກ ກໍ ຈະ ໄປ ທີ່ ນັ້ນ ແມ່ ຢູ່ ບ່ອນ ໃດ ລູກ ກໍ ຂໍ ຢູ່ ບ່ອນນັ້ນ ດ້ວຍ ຍາດພີ່ນ້ອງ ຂອງ ແມ່ ກໍ ຄື ຍາດພີ່ນ້ອງ ຂອງ ລູກ.17ພຣະເຈົ້າ ຂອງ ແມ່ ກໍ ແມ່ນ ພຣະເຈົ້າ ຂອງ ລູກ ແມ່ ຕາຍ ຢູ່ ບ່ອນ ໃດ ລູກ ກໍ ຈະ ຕາຍ ຢູ່ ບ່ອນນັ້ນ ແລະ ສົບ ຂອງ ລູກ ຈະ ຝັງ ຢູ່ ທີ່ ນັ້ນ ດ້ວຍ ຖ້າ ລູກ ປະ ແມ່ ໄປ ກ່ອນ ຕາຍ ຂໍ ໃຫ້ ພຣະຜູ້ເປັນເຈົ້າ ຊົງ ລົງໂທດ ຢ່າງ ໜັກ.”
18ເມື່ອ ນາງ ນາໂອມີ ເຫັນ ນາງຣຸດ ມີ ຄວາມ ຕັ້ງໃຈ ໄປ ກັບ ຕົນ ແທ້ ນາງ ກໍ ບໍ່ ເວົ້າ ຫຍັງ ອີກ.
19ທັງ ສອງ ໄດ້ ພາກັນ ເດີນທາງ ໄປ ຈົນ ຮອດ ເມືອງ ເບັດເລເຮັມ ເມື່ອ ພວກ ນາງ ເຂົ້າໄປ ເມືອງ ນັ້ນ ຊາວເມືອງ ກໍພາກັນ ຕື່ນເຕັ້ນ ທີ່ ເຫັນ ນາງ ກັບ ມາ ພວກ ເຂົາ ຈຶ່ງ ຖາມ ກັນ ວ່າ, “ນີ້ແມ່ນ ນາງ ນາໂອມີ ບໍ?”
20ນາງ ນາໂອມີ ຈຶ່ງ ຕອບ ພວກ ເຂົາ ວ່າ, “ຢ່າ ເອີ້ນ ຂ້ອຍ ວ່າ ນາງ ນາໂອມີ ອີກ ຈົ່ງ ເອີ້ນວ່າ ມາຣາ ເພາະວ່າ ພຣະເຈົ້າ ຜູ້ ມີ ອຳນາດ ຍິ່ງໃຫຍ່ ຊົງ ໃຫ້ ຂ້ອຍ ເຕັມ ໄປ ດ້ວຍ ຄວາມຂົມຂື່ນ.21ຂ້ອຍ ຈາກ ທີ່ ນີ້ ໄປ ດ້ວຍ ຄວາມ ພ້ອມພຽງ ແຕ່ ພຣະເຈົ້າ ໄດ້ ໃຫ້ ຂ້ອຍ ກັບ ມາ ມື ເປົາ ຍ້ອນ ວ່າ ພຣະເຈົ້າ ຊົງ ລົງໂທດ ຂ້ອຍ ແລະ ປະທານ ຄວາມ ທຸກຍາກລຳບາກ ໃຫ້ ແກ່ ຂ້ອຍ ສະນັ້ນ ເປັນ ຫຍັງ ຈຶ່ງ ເອີ້ນ ຂ້ອຍ ວ່າ ນາໂອມີ ຜູ້ ຊົມຊື່ນຍິນດີ?”
22ນາງ ນາໂອມີ ກັບ ນາງຣຸດ ຊາວເມືອງ ໂມອາບ ລູກໃພ້ ຂອງ ນາງ ໄດ້ ກັບ ມາ ຮອດ ເມືອງ ເບັດເລເຮັມ ພໍດີ ກັບ ເວລາ ຕົ້ນ ລະດູ ກ່ຽວ ເຂົ້າ.
ນາງຣຸດ1;1-22
ນາງຣຸດ ເກັບ ຮວງ ເຂົ້າ ເຮ່ຍ ຢູ່ ທົ່ງນາ ຂອງ ໂບອາດ
1ທີ່ ເມືອງ ເບັດເລເຮັມ ນາງ ນາໂອມີ ມີ ພີ່ນ້ອງ ທາງ ຜົວ ຜູ້ ໜຶ່ງ ຊື່ ໂບອາດ ທ່ານ ຜູ້ ນີ້ ເປັນ ຄົນຮັ່ງມີ ແລະ ມີ ອິດທິພົນ.2ຢູ່ ຕໍ່ມາ ນາງຣຸດ ໄດ້ ເວົ້າ ກັບ ຍ່າ ວ່າ, “ແມ່ ລູກ ຂໍ ໄປ ເກັບ ຮວງ ເຂົ້າ ຕົກເຮ່ຍ ຢູ່ ຕາມ ທົ່ງນາ ລູກ ຈະ ເກັບ ຕາມ ຫລັງ ຜູ້ ທີ່ ອະນຸຍາດ ໃຫ້ ເກັບ” ນາງ ນາໂອມີ ຈຶ່ງ ຕອບ ວ່າ, “ຈົ່ງ ໄປ ສາ ລູກ ເອີຍ.”3ແລ້ວ ນາງ ກໍໄດ້ ເດີນ ໄປ ທົ່ງນາ ຫາ ເກັບ ເອົາ ຮວງ ເຂົ້າ ເຮ່ຍ ຕາມ ຫລັງ ພວກ ກ່ຽວ ເຂົ້າ ໂດຍ ບັງເອີນ ນາ ທີ່ ນາງ ໄປ ເກັບ ຮວງ ເຂົ້າ ນັ້ນ ແມ່ນ ນາ ຂອງ ໂບອາດ ພີ່ນ້ອງ ຂອງ ເອລີເມເລັກ.
4ໃນ ຂະນະ ນັ້ນ ໂບອາດ ໄດ້ ອອກ ມາ ແຕ່ ເມືອງ ເບັດເລເຮັມ ເພື່ອ ເບິ່ງ ຄົນ ເຮັດວຽກ ໃນ ນາ ເພິ່ນ ໄດ້ ກ່າວ ອວຍພອນ ໃຫ້ ພວກ ເຂົາ ວ່າ, “ຂໍ ພຣະເຈົ້າ ຊົງ ສະຖິດ ຢູ່ ກັບ ພວກ ເຈົ້າ ເທີ້ນ” ແລ້ວ ພວກ ລູກຈ້າງ ກໍ ຕອບ ວ່າ, “ຂໍ ພຣະເຈົ້າ ຊົງ ອວຍພອນ ໃຫ້ ທ່ານ ເໝືອນ ກັນ ເທີ້ນ.”5ແລະ ໂບອາດ ໄດ້ ຖາມ ຫົວໜ້າ ລູກຈ້າງ ວ່າ, “ຍິງ ຜູ້ນັ້ນ ແມ່ນ ໃຜ?”6ຫົວໜ້າ ຈຶ່ງ ຕອບ ວ່າ, “ແມ່ນ ຍິງ ທີ່ ມາ ຈາກ ປະເທດ ໂມອາບ ນຳ ນາງ ນາໂອມີ.7ນາງ ໄດ້ ມາ ຂໍ ອະນຸຍາດ ນຳ ຂ້ານ້ອຍ ເພື່ອ ເກັບ ຮ່ວງ ເຂົ້າ ທີ່ ເຮ່ຍ ຈາກ ພວກ ເກັບກ່ຽວ ດັ່ງນັ້ນ ນາງ ຈຶ່ງ ໄດ້ ເກັບ ຕັ້ງແຕ່ ເຊົ້າ ຈົນ ຮອດ ດຽວນີ້ ແລະ ໄດ້ ພັກຜ່ອນ ແຕ່ ພຽງ ເລັກນ້ອຍ ເທົ່າ ນັ້ນ.”
8ເມື່ອ ໄດ້ຍິນ ເຊັ່ນ ນັ້ນ ໂບອາດ ກໍ ເວົ້າ ກັບ ນາງຣຸດ ວ່າ, “ນາງ ເອີຍ ເຈົ້າ ຢ່າ ໄປ ເກັບ ຮວງ ເຂົ້າ ບ່ອນ ອື່ນ ເດີ້ ຈົ່ງ ມາ ເກັບ ແຕ່ ໃນ ທົ່ງນາ ນີ້ ແລະ ເຮັດວຽກ ຢູ່ ນຳ ຄົນງານ ຍິງ ຂອງ ຂ້ອຍ.9ຈົ່ງ ເບິ່ງ ຖ້າ ພວກ ເຂົາ ກ່ຽວ ເຂົ້າ ຢູ່ ບ່ອນ ໃດ ເຈົ້າ ຈົ່ງ ໄປ ເກັບ ຢູ່ ບ່ອນນັ້ນ ຂ້ອຍ ໄດ້ ສັ່ງ ຫ້າມ ບໍ່ໃຫ້ ພວກ ຜູ້ຊາຍ ລົບກວນ ເຈົ້າ ຖ້າ ເຈົ້າ ຫິວ ນ້ຳ ຈົ່ງ ໄປ ກິນ ໃນ ໄຫ ທີ່ ພວກ ລູກຈ້າງ ໄດ້ ຕັກ ມາ ໄວ້ ແລ້ວ ນັ້ນ.”
10ເມື່ອ ນາງ ໄດ້ຍິນ ເຊັ່ນ ນັ້ນ ນາງ ກໍ ກົ້ມ ຂາບລົງ ແລະ ເວົ້າ ກັບ ໂບອາດ ວ່າ, “ຂ້ານ້ອຍ ເປັນພຽງ ຄົນ ຕ່າງດ້າວ ເປັນ ຫຍັງ ທ່ານ ຈຶ່ງ ມີ ຄວາມ ເມດຕາ ກະລຸນາ ຕໍ່ ຂ້ານ້ອຍ ເຊັ່ນ ນີ້?”11–12ໂບອາດ ຈຶ່ງ ຕອບ ວ່າ, “ຂ້ອຍ ໄດ້ຍິນ ເລື່ອງ ທີ່ ເຈົ້າ ໄດ້ ປະຕິບັດ ຕໍ່ ຍ່າ ຕັ້ງແຕ່ ຜົວ ຂອງ ເຈົ້າ ໄດ້ ຕາຍ ໄປ ຂ້ອຍ ໄດ້ ຮູ້ວ່າ ເຈົ້າ ຈາກ ພໍ່ ແມ່ ແລະ ບ້ານເກີດ ເມືອງ ນອນ ມາ ຢູ່ໃນ ປະເທດ ທີ່ ເຈົ້າ ບໍ່ ຮູ້ຈັກ ມາ ກ່ອນ ຂໍ ໃຫ້ ພຣະເຈົ້າ ຊົງ ຕອບແທນ ຄຸນ ຄວາມ ດີ ທີ່ ເຈົ້າ ໄດ້ ປະຕິບັດ ມາ ຂໍ ໃຫ້ ພຣະເຈົ້າ ຂອງ ພວກ ອິສຣາເອນ ຜູ້ ຊຶ່ງ ເຈົ້າ ໄດ້ ເພິ່ງ ພາ ອາໄສ ຈົ່ງ ປະທານ ບຳເໜັດ ອັນ ປະເສີດ ໃຫ້ ແກ່ ເຈົ້າ ດ້ວຍ.”13ນາງຣຸດ ກໍ ຕອບ ວ່າ, “ທ່ານ ດີ ຕໍ່ ຂ້ານ້ອຍ ຫລາຍ ນອກ ນີ້ ທ່ານ ຍັງ ໄດ້ ເລົ້າໂລມ ໃຫ້ ກຳລັງ ໃຈ ແກ່ ຂ້ານ້ອຍ ທັງໆ ທີ່ ຂ້ານ້ອຍ ບໍ່ ມີ ຄຸນຄ່າ ເທົ່າທຽມ ກັບ ຄົນໃຊ້ ຄົນ ໜຶ່ງ ຂອງ ທ່ານ ເລີຍ.”
14ເມື່ອ ເວລາ ຮັບ ປະທານ ອາຫານ ໂບອາດ ບອກ ນາງຣຸດ ວ່າ, “ຈົ່ງ ຫຍັບ ເຂົ້າ ມາ ເອົາ ເຂົ້າຈີ່ ແລ້ວ ເອົາ ອາຫານ ຈ້ຳ ແຈ່ວ ສົ້ມ” ນາງຣຸດ ຈຶ່ງ ຫຍັບ ເຂົ້າ ມາ ນັ່ງ ນຳ ພວກ ລູກຈ້າງ ໂບອາດ ໄດ້ ເອົາ ອາຫານ ໃຫ້ ນາງ ຈົນ ນາງ ກິນ ອີ່ມ ແລ້ວ ຍັງ ເອົາ ອາຫານ ທີ່ ເຫລືອນັ້ນ ໃຫ້ ອີກ ດ້ວຍ.15ຫລັງ ຈາກ ກິນ ອີ່ມ ແລ້ວ ກ່ອນ ນາງ ຈະ ໄປ ເກັບ ຮວງ ເຂົ້າ ຕໍ່ ໂບອາດ ໄດ້ ສັ່ງ ລູກຈ້າງ ອີກ ວ່າ, “ຈົ່ງ ອະນຸຍາດ ໃຫ້ ນາງ ເກັບ ຮວງ ເຂົ້າ ໃນ ບ່ອນ ທີ່ ຍັງ ມີ ຟ່ອນ ເຂົ້າ ຢ່າ ລົບກວນ ນາງ.16ໃຫ້ ພວກ ເຈົ້າ ດຶງ ເອົາ ເຂົ້າ ບາງ ຮວງ ອອກຈາກ ມັດ ປະ ໄວ້ ໃຫ້ ນາງ ເກັບ ຕາມ ສະບາຍ ແລະ ຢ່າ ເວົ້າ ຫຍໍ້ ຫຍັນ ຫຍັງ ໃຫ້ ນາງ ເດີ້.17ນາງຣຸດ ໄດ້ ເກັບ ຮວງ ເຂົ້າ ໃນ ນາ ຈົນ ຮອດ ຄ່ຳ ແລ້ວ ຟາດ ເອົາ ເຂົ້າ ທີ່ ເກັບ ມາ ນັ້ນ ໄດ້ ປະມານ ສາມ ໝື່ນ.
18ຫລັງຈາກນັ້ນ ນາງ ກໍ ຖືເອົາ ເຂົ້າ ກັບ ຄືນ ເມືອບ້ານ ຫາ ຍ່າ ໃນ ເມືອງ ພ້ອມ ທັງ ອາຫານ ທີ່ ໂບອາດ ໃຫ້ ມາ ນັ້ນ ໃຫ້ ຍ່າ ເບິ່ງ.19ນາງ ນາໂອມີ ຈຶ່ງ ຖາມວ່າ “ມື້ນີ້ ລູກ ໄດ້ ໄປ ເກັບເຂົ້າ ຢູ່ ບ່ອນ ໃດ? ແມ່ນ ນາ ຂອງ ໃຜ ທີ່ ລູກ ໄປ ເຮັດວຽກ ນຳ? ຂໍ ໃຫ້ ພຣະເຈົ້າ ຊົງ ອວຍພອນ ທ່ານ ຜູ້ ມີ ເມດຕາ ຈິດ ເທີ້ນ” ແລ້ວ ນາງຣຸດ ໄດ້ ເວົ້າໃຫ້ ຍ່າ ຟັງ ວ່າ ນາງ ໄດ້ ໄປ ເຮັດວຽກ ໃນ ນາ ຂອງ ຜູ້ ໜຶ່ງ ຊື່ວ່າ ໂບອາດ.20ນາງ ນາໂອມີ ຈຶ່ງ ເວົ້າ ວ່າ, “ຂໍ ທ່ານ ຜູ້ນັ້ນ ຈົ່ງ ໄດ້ ຮັບ ພຣະພອນ ຈາກ ພຣະເຈົ້າ ຜູ້ ຊົງ ປະຕິບັດ ຕາມ ສັນຍາ ທີ່ ຊົງ ໃຫ້ ໄວ້ ກັບ ຜູ້ ຍັງ ມີຊີວິດ ແລະ ຜູ້ ຕາຍ ໄປ ແລ້ວ” ນາງ ເວົ້າ ຕໍ່ໄປ ອີກ ວ່າ, “ທ່ານ ຜູ້ນັ້ນ ແມ່ນ ຍາດພີ່ນ້ອງ ໃກ້ຊິດ ຂອງ ເຮົາ ຊຶ່ງ ເປັນ ຜູ້ ໜຶ່ງ ທີ່ ມີ ສິດ ໄຖ່ ແລະ ອຸປະຖຳ ຄ້ຳ ຊູ ພວກເຮົາ.”21ນາງຣຸດ ຍັງ ໄດ້ ເວົ້າ ກັບ ຍ່າ ອີກ ວ່າ, “ເພິ່ນ ຍັງ ບອກ ໃຫ້ ລູກ ຢູ່ ກັບ ລູກຈ້າງ ຂອງ ເພິ່ນ ຈົນ ກ່ຽວ ເຂົ້າ ແລ້ວ.”22ນາງ ນາໂອມີ ຈຶ່ງ ຕອບ ວ່າ, “ແມ່ນ ແລ້ວ ລູກ ເອີຍ ເປັນ ການ ດີ ຖ້າ ລູກ ຢູ່ ນຳ ລູກຈ້າງ ຂອງ ເພິ່ນ ແຕ່ ຖ້າ ລູກ ໄປ ນາ ຂອງ ຜູ້ ອື່ນ ອາດຈະ ຖືກ ລົບກວນ.”23ດັ່ງນັ້ນ ນາງຣຸດ ຈຶ່ງ ທຽວ ໄປ ເຮັດວຽກ ນຳ ລູກຈ້າງ ຂອງ ໂບອາດ ຈົນ ກ່ຽວ ເຂົ້າ ແລ້ວ ແຕ່ ນາງ ຍັງ ຢູ່ ກັບ ແມ່ຍ່າ ຂອງ ນາງ.
ນາງຣຸດ2;1-23
ໂບອາດ ເມດຕາ ນາງຣຸດ
1ຄັນ ຕໍ່ມາ ນາງ ນາໂອມີ ໄດ້ ກ່າວ ຕໍ່ ນາງຣຸດ ລູກໃພ້ ຂອງຕົນ ວ່າ, “ລູກ ເອີຍ ແມ່ ຄວນ ຈະ ຊອກຫາ ຜົວ ໃຫ້ ເຈົ້າ ເພື່ອຈະ ມີ ຄອບຄົວ ໃໝ່ ອີກ.2ເຈົ້າ ຈົ່ງ ຮູ້ ໄວ້ ວ່າ ໂບອາດ ນາຍ ຂອງ ພວກ ສາວ ໃຊ້ ທີ່ ເຈົ້າ ໄດ້ ໄປ ເຮັດວຽກ ນຳ ນັ້ນ ເປັນ ພີ່ນ້ອງ ຜູ້ ໜຶ່ງ ຂອງ ພວກເຮົາ ລູກ ຈົ່ງ ຟັງ ໃຫ້ ດີ ໃນ ມື້ ແລງ ນີ້ ເພິ່ນ ຈະ ໄປ ຟາດ ເຂົ້າ ໃນ ລານ.3ດັ່ງນັ້ນ ເຈົ້າ ຈົ່ງ ອາບນ້ຳ ທາ ນ້ຳມັນ ແຕ່ງ ເນື້ອ ແຕ່ງ ຕົວ ແລະ ນຸ່ງ ເຄື່ອງ ອັນ ງາມ ທີ່ສຸດ ແລ້ວ ລົງ ໄປ ໃນ ນາ ບ່ອນ ທີ່ ເພິ່ນ ຟາດ ເຂົ້າ ນັ້ນ ແຕ່ ຢ່າ ໃຫ້ ເພິ່ນ ຮູ້ຈັກ ວ່າ ເຈົ້າ ຢູ່ຫັ້ນ ຈົນ ກວ່າ ເພິ່ນ ຮັບ ປະທານ ອາຫານ ແລະ ດື່ມ ອີ່ມ ແລ້ວ.4ເມື່ອ ເພິ່ນ ໄປ ນອນ ໃຫ້ ເຈົ້າ ຈື່ ບ່ອນ ເພິ່ນ ນອນ ໄວ້ ແລ້ວ ໃຫ້ ເຈົ້າ ຄ່ອຍໆ ເຂົ້າໄປ ເປີດ ຜ້າຫົ່ມ ທີ່ ຕີນ ເພິ່ນ ອອກ ແລ້ວ ນອນ ລົງ ໃນ ເວລາ ນັ້ນ ເພິ່ນ ຈະ ເວົ້າ ກັບ ເຈົ້າ ໃນ ສິ່ງ ທີ່ ເຈົ້າ ຄວນ ຈະ ເຮັດ.”5ນາງຣຸດ ໄດ້ ຕອບ ຍ່າ ວ່າ, “ລູກ ຈະ ເຮັດ ຕາມ ທີ່ ຍ່າ ບອກ.”
6ແລ້ວ ນາງຣຸດ ກໍ ລົງ ໄປ ໃນ ລານເຂົ້າ ແລະ ເຮັດ ຕາມ ທີ່ ຍ່າ ໄດ້ ບອກ ໄວ້ ທຸກ ປະການ.7ຫລັງ ຈາກ ໂບອາດ ໄດ້ ກິນ ແລະ ດື່ມ ອີ່ມ ໜຳ ສຳລານ ໃຈ ແລ້ວ ເພິ່ນ ກໍໄດ້ ໄປ ນອນ ພັກຜ່ອນ ຢູ່ ໃກ້ໆ ກອງ ຟ່ອນ ເຂົ້າ ນາງຣຸດ ຈຶ່ງ ຄ່ອຍໆ ຫຍັບ ເຂົ້າໄປ ເປີດ ຜ້າຫົ່ມ ຢູ່ ຕີນ ເພິ່ນ ອອກ ແລ້ວ ຄ່ອຍໆ ນອນ ລົງ.8ເມື່ອ ໂບອາດ ຮູ້ເມື່ອ ຂຶ້ນ ໃນ ເວລາ ກາງຄືນ ກໍ ຮູ້ສຶກ ປະຫລາດ ໃຈ ທີ່ ເຫັນ ຜູ້ຍິງ ມາ ນອນ ຢູ່ ກ້ອງ ຕີນ ຂອງຕົນ ເພິ່ນ ຈຶ່ງ ຖາມ ຂຶ້ນ ວ່າ, “ເຈົ້າ ແມ່ນ ໃຜ?”9ນາງຣຸດ ກໍ ຕອບ ວ່າ, “ຂ້ານ້ອຍ ແມ່ນ ຣຸດ ສາວ ໃຊ້ ຂອງ ທ່ານ ຂໍ ໃຫ້ ທ່ານ ປົກປັກຮັກສາ ເບິ່ງແຍງ ຂ້ານ້ອຍ ແດ່ທ້ອນ ເພາະ ທ່ານ ເປັນ ພີ່ນ້ອງ ໃກ້ຊິດ ມີ ສິດທິ ໄຖ່ ແລະ ອຸປະຖຳ ຄ້ຳ ຊູ ຂ້ານ້ອຍ.”10ໂບອາດ ໄດ້ ເວົ້າ ວ່າ, “ຂໍ ໃຫ້ ພຣະເຈົ້າ ອວຍພອນ ເຈົ້າ ການ ກະທຳ ຂອງ ເຈົ້າ ຄັ້ງ ນີ້ ເປັນ ທີ່ ໜ້າ ສົງສານ ກວ່າ ຄາວ ກ່ອນ ຊຶ່ງ ຊີ້ ໃຫ້ ເຫັນ ຄວາມ ສັດຊື່ ທີ່ ເຈົ້າ ມີ ຕໍ່ ຄອບຄົວ ແລະ ຕໍ່ ຍ່າ ຂອງ ເຈົ້າ ໂດຍ ບໍ່ໄດ້ ໄປ ຫຍຸ້ງ ກ່ຽວກັບ ຜູ້ ບ່າວ ຄົນ ອື່ນ ທີ່ ຮັ່ງມີ ຫລື ຍາກຈົນ.11ບັດນີ້ ເຈົ້າ ບໍ່ ຕ້ອງ ຢ້ານ ຂ້ອຍ ຈະ ເຮັດ ຕາມ ທີ່ ເຈົ້າ ເວົ້າ ນັ້ນ ທຸກ ຢ່າງ ເພາະ ທຸກໆ ຄົນ ໃນ ເມືອງ ນີ້ ກໍ ຮູ້ ແລ້ວ ວ່າ ເຈົ້າ ເປັນ ຍິງ ດີ.12ແມ່ນ ຄວາມຈິງ ແທ້ ທີ່ ວ່າ ຂ້ອຍ ເປັນ ຜູ້ ໜຶ່ງ ທີ່ ມີ ສິດ ໄຖ່ ເຈົ້າ ແຕ່ ຍັງ ມີ ພີ່ນ້ອງ ທີ່ ໃກ້ຊິດ ກວ່າ ຂ້ອຍ ອີກ ຜູ້ ໜຶ່ງ ທີ່ ມິ ສິດ ໄຖ່ ເຈົ້າ ກ່ອນ.13ເຈົ້າ ຈົ່ງ ນອນ ຢູ່ ທີ່ ນີ້ ກ່ອນ ແລ້ວ ມື້ອື່ນ ເຊົ້າ ຖ້າ ຜູ້ນັ້ນ ຫາກ ຮັບ ໄຖ່ ເຈົ້າ ກໍ ຈົ່ງ ໃຫ້ ເພິ່ນ ເຮັດ ໄດ້ ແຕ່ ຖ້າ ເພິ່ນ ປະຕິເສດ ຂ້ອຍ ຂໍ ສາບານ ຕໍ່ ພຣະເຈົ້າ ຜູ້ ຊົງ ມີຊີວິດ ຢູ່ ວ່າ ຂ້ອຍ ຈະ ຮັບຜິດຊອບ ໃນ ເລື່ອງ ນີ້ ເອງ ເຈົ້າ ຈົ່ງ ຫລັບ ໃຫ້ ສະບາຍ ໃຈ ເທີ້ນ” ຄືນ ນັ້ນ ນາງ ໄດ້ ນອນ ກ້ອງ ຕີນ ຂອງ ໂບອາດ ຈົນ ຂ້ອນ ແຈ້ງ.14ແຕ່ ນາງ ໄດ້ ລຸກ ກ່ອນ ຄົນ ຈະ ເຫັນ ໜ້າ ໂບອາດ ຈຶ່ງ ເວົ້າ ວ່າ, “ບໍ່ ມີ ຜູ້ໃດ ຮູ້ວ່າ ນາງ ມາ ທີ່ ນີ້ ດອກ.”
15ຄັນ ແລ້ວ ໂບອາດ ໄດ້ ເວົ້າ ຕໍ່ ນາງ ວ່າ, “ຈົ່ງ ເອົາ ເສື້ອ ຊັ້ນ ນອກ ທີ່ ເຈົ້າ ນຸ່ງ ນັ້ນ ພື ອອກ” ນາງຣຸດ ກໍ ເຮັດ ຕາມ ໂບອາດ ຈຶ່ງ ຜອງ ເຂົ້າ ໃຫ້ ນາງ ສາມ ກະລຸມ ນາງ ໄດ້ ແບກ ເອົາ ເຂົ້າ ແລ້ວ ກັບ ຄືນ ເມືອ ເຮືອນ.16ເມື່ອ ນາງ ກັບ ມາ ຮອດ ເຮືອນ ຍ່າ ກໍ ຖາມວ່າ, “ເປັນ ແນວໃດ ລູກ?” ນາງຣຸດ ກໍ ເລົ່າເລື່ອງ ທຸກ ຢ່າງ ທີ່ ໂບອາດ ໄດ້ ເວົ້າ ແລະ ໄດ້ ເຮັດ ຕໍ່ ນາງ ສູ່ ຍ່າ ຟັງ.17ນາງ ໄດ້ ເວົ້າ ວ່າ, “ເພິ່ນ ຍັງ ໄດ້ ເອົາ ເຂົ້າ ສາມ ກະລຸມ ນີ້ ໃຫ້ ເພາະ ເພິ່ນ ບໍ່ຢາກ ໃຫ້ ລູກ ກັບ ມາ ມື ເປົ່າ.”18ນາງ ນາໂອມີ ຈຶ່ງ ເວົ້າ ວ່າ, “ລູກ ຈົ່ງ ສະບາຍ ໃຈ ເທີ້ນ ຕົກ ມາ ຮອດ ນີ້ ລູກ ກໍ ຄົງ ຈະ ຮູ້ ແລ້ວ ວ່າ ເລື່ອງ ມັນ ຈະ ຈົບລົງ ແນວໃດ ເພາະ ໂບອາດ ຄົງ ຈະ ບໍ່ ສະບາຍ ໃຈ ຖ້າ ບໍ່ໄດ້ ຈັດການ ກັບ ເລື່ອງ ນີ້ ໃຫ້ ຮຽບຮ້ອຍ ໃນ ມື້ນີ້.”
ນາງຣຸດ3;1-18
ໂບອາດ ເອົາ ຣຸດ ເປັນ ເມຍ
1ໂບອາດ ໄດ້ ໄປ ນັ່ງ ຢູ່ໃນ ບ່ອນ ປະຊຸມ ທີ່ ປະຕູ ເຂົ້າ ເມືອງ ໃນ ຂະນະ ນັ້ນ ພໍດີ ກັບ ພີ່ນ້ອງ ຜູ້ ໃກ້ຊິດ ກັບ ເອລີເມເລັກ ຜູ້ ມີ ສິດ ໄຖ່ ແລະ ອຸປະຖຳ ຄ້ຳ ຊູ ທີ່ ເພິ່ນ ກ່າວເຖິງ ນັ້ນ ຍ່າງ ຜ່ານມາ ໂບອາດ ຈຶ່ງ ຖື ໂອກາດ ເຊື້ອ ເຊີນ ເພິ່ນ ນັ່ງ ລົງ.2ນອກ ນີ້ ເພິ່ນ ຍັງ ໄດ້ ເຊື້ອ ເຊີນ ພວກ ເຖົ້າ ແກ່ ໃນ ເມືອງ ສິບ ຄົນ ມາ ຮ່ວມ ດ້ວຍ ເມື່ອ ມາ ພ້ອມພຽງກັນ ແລ້ວ.3ໂບອາດ ຈຶ່ງ ເວົ້າ ກັບ ພີ່ນ້ອງ ຂອງ ເອລີເມເລັກ ວ່າ, “ບັດນີ້ ນາງ ນາໂອມີ ໄດ້ ມາ ແຕ່ ປະເທດ ໂມອາບ ມາ ຮອດ ບ້ານເກີດ ເມືອງ ນອນ ແລ້ວ ນາງ ຕ້ອງການ ຂາຍ ດິນ ຂອງ ເອລີເມເລັກ ຜູ້ ເປັນ ຍາດພີ່ນ້ອງ ຂອງ ພວກເຮົາ.4ຂ້ອຍ ໄດ້ ຕັດສິນໃຈ ຄັກແນ່ ແລ້ວ ທີ່ ຈະ ເວົ້າ ເລື່ອງ ນີ້ ກັບ ເຈົ້າ ຄື ວ່າ ຖ້າ ເຈົ້າ ຕ້ອງການ ຢາກ ຊົດ ຊ່ອຍ ຍົກ ຊື່ສຽງ ຂອງ ຜູ້ ຕາຍ ໄປ ແລ້ວ ຈົ່ງ ຕັດສິນໃຈ ຊື້ ດິນ ນີ້ ເສຍ ຕໍ່ໜ້າ ພວກ ເຖົ້າ ແກ່ ທີ່ ນັ່ງ ຢູ່ ທີ່ ນີ້ ເພື່ອ ເປັນ ພະຍານ ຫລັກ ຖານ ໃຫ້ ແຕ່ ຖ້າ ເຈົ້າ ບໍ່ ຕ້ອງການ ຈົ່ງ ບອກ ໃຫ້ ຂ້ອຍ ຮູ້ ເພາະວ່າ ສິດທິ ໃນ ການ ຊື້ ນັ້ນ ເປັນ ຂອງ ເຈົ້າ ກ່ອນ ແລ້ວ ຈຶ່ງ ເປັນ ຂອງ ຂ້ອຍ ຕາມ ຫລັງ” ຊາຍ ຜູ້ນັ້ນ ໄດ້ ເວົ້າ ຂຶ້ນ ວ່າ, “ຂ້ອຍ ຍິນດີ ຈະ ຊື້ ດິນ ນັ້ນ.”5ໂບອາດ ຈຶ່ງ ເວົ້າ ຂຶ້ນ ວ່າ, “ຖ້າ ເຈົ້າ ຊື້ ດິນ ຈາກ ນາງ ນາໂອມີ ນາງຣຸດ ຊຶ່ງ ເປັນ ແມ່ໝ້າຍ ຕ້ອງ ເປັນ ເມຍ ຂອງ ເຈົ້າ ແລະ ດິນ ທີ່ ເຈົ້າ ຈະ ຊື້ ຕ້ອງ ຕົກ ເປັນ ຂອງ ຄອບຄົວ ຂອງ ຜູ້ ທີ່ ຕາຍ ແລ້ວ ນັ້ນ.”6ຊາຍ ຜູ້ນັ້ນ ກໍ ຕອບ ວ່າ, “ຖ້າ ເປັນ ຢ່າງ ນີ້ ຂ້ອຍ ກໍ ບໍ່ ສາມາດ ຈະ ຊື້ ໄດ້ ເພາະ ການ ຊື້ ນັ້ນ ອາດຈະ ເຮັດໃຫ້ ມໍລະດົກ ຂອງ ຂ້ອຍເອງ ສູນເສຍ ໄປ ເຈົ້າ ຈົ່ງ ໃຊ້ ສິດທິ ຂອງ ຂ້ອຍ ຊື້ ດິນ ນັ້ນ ເສຍ ເທີ້ນ ຂ້ອຍ ບໍ່ ຕ້ອງການ ອີກ ແລ້ວ.”7ໃນ ສະໄໝ ກ່ອນ ລາຊະອານາຈັກ ອິສຣາເອນ ມີ ທຳນຽມ ຢູ່ ວ່າ ເມື່ອ ຜູ້ ໜຶ່ງ ມອບ ສິດທິ ໃຫ້ ຜູ້ ໜຶ່ງ ອີກ ຫລື ແລກປ່ຽນ ຊື້ ຂາຍ ກັນ ຜູ້ ຂາຍ ຕ້ອງ ປົດ ເກີບ ສົ່ງ ໃຫ້ ຜູ້ ຊື້ ການ ກະທຳ ເຊັ່ນ ນີ້ ໃຊ້ ເປັນ ພະຍານ ຫລັກ ຖານ ທີ່ ນິຍົມ ກັນ ໃນ ລາຊະອານາຈັກ ອິສຣາເອນ.8ດັ່ງນັ້ນ ຍາດພີ່ນ້ອງ ຂອງ ເອລີເມເລັກ ຜູ້ ມີ ສິດທິ ໃນ ການ ໄຖ່ ຈຶ່ງ ເວົ້າ ວ່າ, “ເຈົ້າ ຈົ່ງ ຊື້ ສິ່ງ ເຫລົ່ານີ້ ເສຍ ເທີ້ນ” ແລ້ວ ເພິ່ນ ກໍ ປົດ ເກີບ ໃຫ້ ແກ່ ໂບອາດ.9ໂບອາດ ຈຶ່ງ ກ່າວ ກັບ ພວກ ເຖົ້າ ແກ່ ແລະ ພວກ ທີ່ ມາ ຮ່ວມ ໃນ ພິທີ ນັ້ນ ວ່າ, “ມື້ນີ້ ທ່ານ ທັງຫລາຍ ຈົ່ງ ເປັນ ພະຍານ ໃຫ້ ແກ່ ຂ້າພະເຈົ້າ ດ້ວຍ ວ່າ ຂ້າພະເຈົ້າ ໄດ້ ຊື້ ທຸກ ສິ່ງ ທຸກ ຢ່າງ ຂອງ ເອລີເມເລັກ ຂອງ ກີລີໂອນ ແລະ ຂອງ ມາໂລນ ຈາກ ນາງ ນາໂອມີ ແລ້ວ.10ນອກ ນີ້ ນາງຣຸດ ຊາວ ໂມອາບ ເມຍ ຂອງ ມາໂລນ ຜູ້ ທີ່ ຕາຍ ໄປ ແລ້ວ ກໍ ຕົກ ເປັນ ເມຍ ຂອງ ຂ້າພະເຈົ້າ ດ້ວຍ ຂ້າພະເຈົ້າ ຢາກ ໃຫ້ ມໍລະດົກ ຍັງ ມີ ຢູ່ໃນ ຄອບຄົວ ຂອງ ຜູ້ ທີ່ ຕາຍ ເພື່ອ ໃຫ້ ຊື່ ຂອງ ລາວ ຍັງ ມີ ຢູ່ໃນ ຖ້າມກາງ ພວກ ພີ່ນ້ອງ ແລະ ບ້ານເມືອງ ຂໍ ໃຫ້ ພວກ ທ່ານ ຈົ່ງ ເປັນ ພະຍານ ຕໍ່ ເຫດການ ໃນ ມື້ນີ້ ດ້ວຍ.”11ພວກ ປະຊາຊົນ ທີ່ຢູ່ ໃນ ທີ່ ນັ້ນ ກໍ ພ້ອມ ກັນ ຕອບ ວ່າ, “ພວກເຮົາ ຍິນດີ ເປັນ ພະຍານ ໃຫ້.” ຝ່າຍ ພວກ ເຖົ້າ ແກ່ ກໍ ເວົ້າ ວ່າ, “ຂໍ ໃຫ້ ພຣະຜູ້ເປັນເຈົ້າ ຊົງ ໂຜດຊ່ອຍ ໃຫ້ ຍິງ ທີ່ ຈະ ໄປ ຢູ່ບ້ານ ຂອງ ເຈົ້າ ນັ້ນ ເປັນ ເໝືອນ ນາງ ຣາເຂນ ແລະ ນາງ ເລອາ ຜູ້ ຊຶ່ງ ມີ ລູກຫລານ ຫລາຍ ສືບ ເຊື້ອສາຍ ໃຫ້ ແກ່ ລາຊະອານາຈັກ ອິສຣາເອນ ຂໍ ໃຫ້ ເຈົ້າ ເປັນ ຜູ້ ຮັ່ງມີ ໃນ ເອຟຣາທາ ແລະ ມີ ຊື່ສຽງໂດງດັງ ໃນ ເມືອງ ເບັດເລເຮັມ ເທີ້ນ.12ຂໍ ໃຫ້ ເດັກນ້ອຍ ຜູ້ ທີ່ ພຣະຜູ້ເປັນເຈົ້າ ໂຜດປະທານ ໃຫ້ ເຈົ້າ ຈາກ ຍິງສາວ ຄົນ ນີ້ ຈົ່ງ ເປັນ ເໝືອນ ຄອບຄົວ ຂອງ ເປເຣັດ ລູກຊາຍ ຂອງ ຢູດາ ແລະ ນາງ ຕາມາ ເທີ້ນ.”
13ແລ້ວ ໂບອາດ ກໍ ເອົາ ນາງຣຸດ ມາ ເປັນ ເມຍ ແລະ ສົມສູ່ ຢູ່ ກິນ ດ້ວຍ ກັນ.14–15ຕໍ່ມາ ພຣະເຈົ້າ ໄດ້ ຊົງ ໂຜດໃຫ້ ນາງ ຖືພາ ແລະ ໄດ້ ລູກຊາຍ ຜູ້ ໜຶ່ງ ຜູ້ຍິງ ທັງຫລາຍ ໃນ ເມືອງ ເບັດເລເຮັມ ຈຶ່ງ ເວົ້າ ກັບ ນາງ ນາໂອມີ ວ່າ, “ຈົ່ງ ຂອບ ພຣະຄຸນ ພຣະຜູ້ເປັນເຈົ້າ ສາ ເພາະ ພຣະອົງ ຊົງ ໂຜດໃຫ້ ເຈົ້າ ມີ ຫລານ ຊາຍ ຜູ້ ຈະ ບົວລະບັດ ເຈົ້າ ຂໍ ໃຫ້ ເດັກນ້ອຍ ຜູ້ ນີ້ ມີ ຊື່ສຽງໂດງດັງ ໃນ ລາຊະອານາຈັກ ອິສຣາເອນ ເປັນ ກຳລັງ ໃຈ ແລະ ເປັນ ຜູ້ ຄຸ້ມຄອງ ຮັກສາ ເຈົ້າ ໃນ ເວລາ ເຖົ້າ ແກ່ ລູກໃພ້ ຜູ້ ເປັນ ແມ່ ຂອງ ເດັກນ້ອຍ ນີ້ ຮັກ ເຈົ້າ ຫລາຍ ນາງ ສາມາດ ບົວລະບັດ ເຈົ້າ ໄດ້ ດີ ກວ່າ ລູກຊາຍ ເຈັດ ຄົນ ຂອງ ເຈົ້າ.”16ນາງ ນາໂອມີ ໄດ້ ເອົາໃຈ ໃສ່ ເບິ່ງແຍງ ແລະ ລ້ຽງ ຫລານ ຊາຍ ຜູ້ ນີ້ ເປັນ ຢ່າງ ດີ.17ພວກ ຜູ້ຍິງ ບ້ານ ໃກ້ ເຮືອນ ຄຽງ ໄດ້ ຕັ້ງຊື່ ໃຫ້ ເດັກນ້ອຍ ຜູ້ນັ້ນ ວ່າ, “ໂອເບັດ ພວກ ເຂົາ ພາກັນ ເວົ້າ ວ່າ, “ເດັກນ້ອຍ ນີ້ແມ່ນ ລູກ ນາງ ນາໂອມີ” ຕໍ່ມາ ໂອເບັດ ໄດ້ ເປັນ ພໍ່ ຂອງ ເຢຊາຍ ແລະ ເຢຊາຍ ໄດ້ ເປັນ ພໍ່ ຂອງ ດາວິດ.
ບັນພະບູລຸດ ຂອງ ດາວິດ
18ເຊື້ອສາຍ ຂອງ ເປເຣັດ ນັບ ຕັ້ງແຕ່ ເປເຣັດ ມາ ມີ ດັ່ງນີ້: ເປເຣັດ ເປັນ ພໍ່ ເຮັດຊະໂຣນ,19–21ເຮັດຊະໂຣນ ເປັນ ພໍ່ ຂອງ ຣາມ ຣາມ ເປັນ ພໍ່ ຂອງ ອຳມີນາດາບ ອຳມີນາດາບ ເປັນ ພໍ່ ນາໂຊນ ນາໂຊນ ເປັນ ພໍ່ ຊັນໂມນ ຊັນໂມນ ເປັນ ພໍ່ ໂບອາດ.22ໂບອາດ ເປັນ ພໍ່ ໂອເບັດ ໂອເບັດ ເປັນ ພໍ່ ເຢຊາຍ ແລະ ເຢຊາຍ ເປັນ ພໍ່ ຂອງ ດາວິດ.
ນາງຣຸດ4;1-22