Lao

ຈົດເຊັນບັນຊີ13

1ພຣະ­ຜູ້­ເປັນ­ເຈົ້າ ຊົງ ກ່າວ ຕໍ່ ໂມ­ເຊ ວ່າ,2“ຈົ່ງ ເລືອກ ເອົາ ຜູ້­ນຳ ຄົນ ໜຶ່ງ ໃນ ແຕ່­ລະ ຕະ­ກູນ ໃຫ້ ໄປ ສືບ ສອດ ແນມ­ເບິ່ງ ປະ­ເທດ ກາ­ນາ­ອານ ຊຶ່ງ ເປັນ ບ່ອນ ທີ່ ເຮົາ ໄດ້ ມອບ ໃຫ້ ພວກ ອິ­ສຣາ­ເອນ.3–15ແລ້ວ ໂມ­ເຊ ກໍ ປະ­ຕິ­ບັດ ຕາມ ໂດຍ ໄດ້ ຈັດ ສົ່ງ ພວກ­ຜູ້­ນຳ ຕໍ່­ໄປ ນີ້ ອອກ­ຈາກ ຖິ່ນ ກັນ­ດານ ປາ­ຣານ ເພື່ອ ໄປ ຍັງ ປະ­ເທດ ກາ­ນາ­ອານ ຄື:

ຊາມ­ມູ­ອາ ລູກ­ຊາຍ ຂອງ ຊາ­ກູ­ເຣມາ ຈາກ ຕະ­ກູນ ຣູ­ເບັນ
ຊາ­ຟາດ ລູກ­ຊາຍ ຂອງ ໂຮ­ຣີມາ ຈາກ ຕະ­ກູນ ຊິ­ເມ­ໂອນ
ກາ­ເລັບ ລູກ­ຊາຍ ຂອງ ເຢ­ຟຸນ­ເນມາ ຈາກ ຕະ­ກູນ ຢູ­ດາ
ອີ­ການ ລູກ­ຊາຍ ຂອງ ໂຢ­ເຊັບມາ ຈາກ ຕະ­ກູນ ອິດ­ຊາ­ຂາ
ໂຮ­ເຊ­ອາ ລູກ­ຊາຍ ຂອງ ນູນມາ ຈາກ ຕະ­ກູນ ເອ­ຟຣາ­ອິມ
ປັນ­ຕີ ລູກ­ຊາຍ ຂອງ ຣາ­ຟູມາ ຈາກ ຕະ­ກູນ ເບັນ­ຢາ­ມິນ
ກາດ­ດີ­ເອນ ລູກ­ຊາຍ ຂອງ ໂສ­ດີມາ ຈາກ ຕະ­ກູນ ເຊ­ບູ­ລູນ
ກາດ­ດີ ລູກ­ຊາຍ ຂອງ ສູ­ສີມາ ຈາກ ຕະ­ກູນ ໂຢ­ເຊັບ (ມາ­ນາ­ເຊ)
ອຳ­ມີ­ເອນ ລູກ­ຊາຍ ຂອງ ເກ­ມາ­ລີມາ ຈາກ ຕະ­ກູນ ດານ
ເສ­ທູ­ເຣ ລູກ­ຊາຍ ຂອງ ມີ­ກາ­ເອນມາ ຈາກ ຕະ­ກູນ ອາ­ເຊ
ນາ­ບີ ລູກ­ຊາຍ ຂອງ ໂວບ­ສີມາ ຈາກ ຕະ­ກູນ ນັບ­ທາ­ລີ
ເກ­ອູ­ເອນ ລູກ­ຊາຍ ຂອງ ມາ­ກີມາ ຈາກ ຕະ­ກູນ ຄາດ

16ພວກ ເຫລົ່າ­ນີ້ ຄື ພວກ ນັກ ສືບ ສອດ­ແນມ ທີ່ ໂມ­ເຊ ສົ່ງ ໄປ ສຳ­ຫລວດ ກວດ­ເບິ່ງ ຜືນ ແຜ່ນ­ດິນ ກາ­ນາ­ອານ ເພິ່ນ ໄດ້ ປ່ຽນ ຊື່ ໃໝ່ ໃຫ້ ໂຮ­ເຊ­ອາ ລູກ­ຊາຍ ຂອງ ນູນ ວ່າ ໂຢ­ຊວຍ.

17ໂມ­ເຊ ໄດ້ ສົ່ງ ພວກ ນີ້ ອອກ ໄປ ແລະ ສັ່ງ ພວກ ເຂົາ ວ່າ, “ໃຫ້ ໄປ ແຕ່ ທິດ­ເໜືອ ຫາ ທິດ­ໃຕ້ ແລະ ຕະ­ຫລອດ ທົ່ວ ທັງ ປະ­ເທດ ແລ້ວ ໃຫ້ ໄປ ຍັງ ເນີນ ພູ.18ເພື່ອ ສຳ­ຫລວດ ກວດ ເບິ່ງ­ວ່າ ປະ­ເທດ ນີ້ ເປັນ ຢ່າງ­ໃດ ມີ ປະ­ຊາ­ຊົນ ຈັກ ຄົນ ແລະ ມີ ກຳ­ລັງ ພົນ ໜ້ອຍ ຫລາຍ ແລະ ເຂັ້ມ­ແຂງ ປານ­ໃດ.19ໃຫ້ ສຳ­ຫລວດ ກວດ­ເບິ່ງ ອີກ ວ່າ ປະ­ເທດ ນີ້ ອຸ­ດົມ­ສົມ­ບູນ ຫລື ບໍ່ ປະ­ຊາ­ຊົນ ຢູ່­ໃນ ເມືອງ ທີ່ ບໍ່ ມີ ກຳ­ແພງ ຫລື ຢູ່­ໃນ ປ້ອມ.20ໃຫ້ ເບິ່ງ­ວ່າ ເມືອງ ນີ້ ອຸ­ດົມ­ສົມ­ບູນ ຫລື ແຫ້ງ­ແລ້ງ ແລະ ມີ ປ່າ­ໄມ້ ຫລາຍ ບໍ? ຈົ່ງ ມີ­ໃຈ ອົງ­ອາດ ກ້າ­ຫານ ແລະ ໃຫ້ ນຳ ເອົາ ຜົນ­ລະ­ປູກ ບາງ­ຢ່າງ ທີ່ ເກີດ ຂຶ້ນ ຈາກ ບ່ອນ­ນັ້ນ ມາ (ຍາມ ນັ້ນ ເປັນ ຍາມ ທີ່ ໝາກ ອະ­ງຸ່ນ ກຳ­ລັງ ສຸກ).

21ດັ່ງ­ນັ້ນ ພວກ ນັກ ສືບ ຈຶ່ງ ໄດ້ ເດີນ­ທາງ ໄປ ຍັງ ເຂດ ເໜືອ ເພື່ອ ສຳ­ຫລວດ ກວດ­ເບິ່ງ ດິນ­ແດນ ຕັ້ງ­ແຕ່ ປ່າ ກັນ­ດານ ຊິນ ທາງ ເຂດ ໃຕ້ ຈົນ ຮອດ ທາງ ໄປ ສູ່ ເຣ­ໂຮບ ໃກ້ ກັບ ຮາ­ມັດ ຢູ່ ທາງ ທິດ­ເໜືອ.22ພວກ ເຂົາ ພາ­ກັນ ໄປ ທາງ ເຂດ ໃຕ້ ກ່ອນ ແລ້ວ ມາ ທາງ ເຮັບ­ໂຣນ ຊຶ່ງ ເປັນ ບ່ອນ­ຢູ່ ຂອງ ຊາວ ເຜົ່າ ອາ­ຮີ­ມານ ເຜົ່າ ເຊ­ຊາຍ ແລະ ເຜົ່າ ຕານ­ມາຍ ພວກ ເຜົ່າ ເຫລົ່າ­ນີ້ ເປັນ ເຊື້ອ­ສາຍ ຂອງ ຊົນ­ຊາດ ຮູບ­ຮ່າງ ໃຫຍ່ ຄື ພວກ ອາ­ນາ­ກີມ (ເພິ່ນ ໄດ້ ສ້າງ ເມືອງ ເຮັບ­ໂຣນ ກ່ອນ ເມືອງ ໂຊ­ອານ ທີ່ ປະ­ເທດ ເອ­ຢິບ ເຈັດ ປີ).23ພວກ ເຂົາ ໄດ້ ເດີນ­ທາງ ມາ ຮ່ອມ ເອັດ­ຊະ­ໂຄນ ຢູ່ ທີ່ ນີ້ ພວກ ເຂົາ ໄດ້ ຕັດ ເອົາ ງ່າ ຕົ້ນ ອະ­ງຸ່ນ ຊຶ່ງ ມີ ພວງ ດົກ­ໜາ ຈົນ ມີ ສອງ ຄົນ­ໃຊ້ ໄມ້ ຫາມ ພວກ ເຂົາ ຍັງ ໄດ້ ນຳ ເອົາ ໝາກ ພິ­ລາ ແລະ ໝາກ­ເດື່ອ ມາ ນຳ.24(ບ່ອນ­ນີ້ ເອີ້ນ ຊື່­ວ່າ ຮ່ອມ ເອັດ­ຊະ­ໂຄນ ຮ່ອມ ໝາກ ອະ­ງຸ່ນ ເພາະ­ວ່າ ພວກ ອິ­ສຣາ­ເອນ ໄດ້ ຕັດ ເອົາ ພົ້ວ ໝາກ ອະ­ງຸ່ນ ຢູ່ ບ່ອນ­ນັ້ນ).

25–26ຫລັງ ຈາກ ສຳ­ຫລວດ ກວດ­ເບິ່ງ ດິນ­ແດນ ໄດ້ ສີ່ ສິບ ມື້ ແລ້ວ ພວກ ເຂົາ ກໍ­ພາ­ກັນ ກັບ ຄືນ ມາ ຫາ ໂມ­ເຊ ກັບ ອາ­ໂຣນ ແລະ ພວກ ຊຸມ­ນຸມ­ຊົນ ອິ­ສຣາ­ເອນ ທີ່ ກາ­ເດັດ ໃນ ຖິ່ນ ກັນ­ດານ ປາ­ຣານ ພວກ ເຂົາ ໄດ້ ລາຍ ງານ ທຸກ ສິ່ງ ທີ່ ໄດ້ ເຫັນ ແລະ ໄດ້ ເອົາ ໝາກ ໄມ້ ທີ່ ນຳ ມາ ນັ້ນ ໃຫ້ ທຸກ ຄົນ ເບິ່ງ.27ພວກ ເຂົາ ບອກ ກັບ ໂມ­ເຊ ວ່າ, “ພວກ ຂ້າ­ນ້ອຍ ໄດ້ ສຳ­ຫລວດ ເບິ່ງ ຜືນ ແຜ່ນ­ດິນ ຕາມ ທີ່ ໄດ້ ສົ່ງ ໄປ ນັ້ນ­ແລ້ວ ດິນ­ແດນ ແຫ່ງ ນີ້ ຮັ່ງ­ມີ ແລະ ອຸ­ດົມ­ສົມ­ບູນ ຫລາຍ ແລະ ນີ້ ເດ ໝາກ ໄມ້ ບາງ ຊະ­ນິດ ຈາກ ປະ­ເທດ ນັ້ນ.28ແຕ່­ວ່າ ປະ­ຊາ­ຊົນ ຢູ່ ບ່ອນ­ນີ້ ມີ ອຳ­ນາດ ຫລາຍ ແລະ ຫົວ ເມືອງ ຕ່າງໆ ຂອງ ພວກ ເຂົາ ກໍ ກວ້າງ ໃຫຍ່ ໄພ­ສານ ທັງ ມີ ກຳ­ແພງ ປ້ອງ­ກັນ ໄວ້ ຢ່າງ ດີ ຍິ່ງ ໄປ ກວ່າ ນີ້ ພວກ ຂ້າ­ນ້ອຍ ຍັງ ໄດ້ ເຫັນ ເຊື້ອ­ສາຍ ຂອງ ອາ­ນາກ ຊຶ່ງ ເປັນ ຄົນ ມີ ຮູບ­ຮ່າງ ໃຫຍ່ ສູງ.29ສ່ວນ ອາ­ມາ­ເລັກ ກໍ ຢູ່ ທາງ ເຂດ ເບື້ອງ ໃຕ້ ແລະ ພວກ ຮິດ­ຕີ ພວກ ເຢ­ບຸດ ພວກ ອະ­ໂມ­ຣີດ ກໍ ຢູ່ ເທິງ ພູ ນ້ອຍ ພວກ ກາ­ນາ­ອານ ຢູ່ ໃກ້ ທະ­ເລ ເມ­ດິ­ແຕຣ­າເນ ແລະ ຢູ່ ຕາມ ຝັ່ງ ແມ່­ນ້ຳ ຢໍ­ແດນ.”

30ແລ້ວ ກາ­ເລັບ ຈຶ່ງ ບອກ ໃຫ້ ປະ­ຊາ­ຊົນ ທີ່ ຮ້ອງ­ທຸກ ຕໍ່ ໂມ­ເຊ ມິດ ງຽບ ແລະ ເວົ້າ ຕໍ່­ໄປ ວ່າ, “ພວກ­ເຮົາ ມີ ກຳ­ລັງ ພຽງ­ພໍ ທີ່ ຈະ ຊະ­ນະ ໄດ້ ດັ່ງ­ນັ້ນ ພວກ­ເຮົາ ຕ້ອງ ເຂົ້າ ໂຈມ­ຕີ ແລະ ຍຶດ ເອົາ ດິນ­ແດນ ແຫ່ງ ນີ້ ດຽວ­ນີ້.”31ແຕ່­ວ່າ ພວກ ທີ່ ໄປ ນຳ ກາ­ເລັບ ໄດ້ ເວົ້າ ວ່າ, “ບໍ່­ໄດ້ ພວກ­ເຮົາ ຍັງ ບໍ່ ທັນ ມີ ກຳ­ລັງ ພຽງ­ພໍ ທີ່ ຈະ ໄປ ຕີ ເພາະ­ວ່າ ປະ­ຊາ­ຊົນ ຢູ່ ບ່ອນ­ນັ້ນ ມີ ກຳ­ລັງ ຫລາຍ­ກວ່າ ພວກ­ເຮົາ.”32ພວກ ເຂົາ ໄດ້ ລາຍ ງານ ຄວາມ­ບໍ່­ຈິງ ກ່ຽວ­ກັບ ແຜ່ນ­ດິນ ທີ່ ໄດ້ ໄປ ສຳ­ຫລວດ ມາ ຕໍ່ ພວກ ອິ­ສຣາ­ເອນ ໂດຍ ພວກ ເຂົາ ເວົ້າ ວ່າ, “ດິນ­ແດນ ແຫ່ງ ນັ້ນ ບໍ່ ມີ ພືດ­ຜົນ ຢ່າງ­ໃດ ພໍ ທີ່ ຈະ ລ້ຽງ ຝູງ ຄົນ­ທີ່ ນັ້ນ ໄດ້ ທຸກ ຄົນ­ທີ່ ພວກ­ເຮົາ ໄດ້ ພົບ ເຫັນ ເປັນ ຄົນ ສູງ ໃຫຍ່ ທີ່ ເປັນ ເຊື້ອ­ສາຍ ຂອງ ອາ­ນາກ.33ພວກ ເຂົາ ຫລຽວ ເບິ່ງ ພວກ­ເຮົາ ຄື ກັບ ຝູງ ຕັກ­ແຕນ ໂຕ ນ້ອຍໆ ເທົ່າ ນັ້ນ ແລະ ກໍ ເປັນ ດັ່ງ­ນັ້ນ ໃນ ສາຍ­ຕາ ຂອງ ພວກ­ເຮົາ ດ້ວຍ.”

ຈົດເຊັນບັນຊີ13;133